DILI— Prokurador Jeral
Republika Jose da Costa Ximenes, fo tomada de pose ba majistradu
ministeriu publiku nain tolu neebe hetan promosaun kareira professional
ministeriu publiku Majistradu nain tolu neebe hetan
promosaun hanesan doutora Angelinha Saldanha, promove ba inspetura,
doutor Afonso Lopes, no doutora Ivonia Guterres.
Hafoin tomada de pose ba jornalista
Prokurador Jeral Republika, Jose Ximenes dehan prokurador jeral marka
tan momentu importante ida, tanba ba dala uluk fo pose ba inspetor
timor oan ida, doutora Angelinha neebe antes nee nia kaer kargu hanesan
prokurador da republika, depois sai hanesan mos xefi prokurador
distrital de Dili neebe servisu mos iha gabinete sentral kombate
korupsaun no kriminalidade organizada, nia hetan promosaun hodi sai
hanesan inspetora ba ministeriu publiku nian.
Nee sai hanesan pasu importante ida, tanba foin ba dala uluk, iha timor oan ida mak toma konta ba inspesaun. Tanba nee inspesaun laos ba halo deit servisu kuadru prokurador sira deit, maibe ba ofisial de justisa sira, atu bele hare servisu ministeriu publiku nian, ida neebe diak ona presiza hadia diak liu, ida neebe la diak presiza hadia,” dehan Prokurador Jeral Da Republika Jose Da Costa Ximenes ba Jornalista sira iha salaun PJR Colmera Kuarta, (20/09/2017).
Nia hatutan servisu inspesaun, hare mos
ba servisu profesionais majistradu sira nian lao oinsa, no prokurador
sira neebe halo servisu diak merese atu bele hetan promosaun, kuandu
tempu atu promove, ida neebe mak ladun servisu diak bele hare fali,
laos fo kastigu deit maibe presiza hare atu promove laos sira neebe iha
nivel majistadu sira deit, maibe iha nivel ofisial de justisa sira.
PJR informa Doutora Ivonia uluk hanesan
prokurador da republika Baucau, depois muda mai iha Dili, no promove
fali ba iha Baucau kaer servisu hanesan xefi prokurador iha Baucau, no
doutor Afonso servisu iha Suai 2009 muda ba iha Oecuse hanesan xefi
prokurador ba fali iha Baucau hanesan xefi prokurador no promove mai iha
Dili hanesan xefi prokurador mos.
Nia hatutan iha nivel hotu iha ministeriu
publiku inspetor mesak ema timor oan servisu kontesiozu administrativa
fiskais de kontas mos ema timor oan hotu ona, laiha internasional.
internasional nia papel mak sai hanesan mentor deit la kaer prosesu.
Nunee, sei rezerva tan ema ida, atu lori
ba konsellu deskute hili atu fo apoiu sevisu inspesaun nian. Tanba
servisu inspesaun nian presiza ema nain rua atu lori servisu nee lao ba
oin.
Majistradu nee tuir PJR nia meritu no
esperiensia naruk tebes, tanba nee fiar katak kurikulum ezemplar no
nivel kompetensia dedikasaun neebe aas, oinsa bele koresponde sira nia
perspektiva no responsabilidade profesional. Garante ministeriu publiku
nuudar instituisaun estadu nian, neebe kolabora sei halo justisa sei
benefisia ho responsabilidade ba servisu neebe iha. Importante atu halo
fiskalizasaun ba servisu ministeru publiku nian, neebe sai hanesan pilar
importante ba konsellu superior ministeriu publiku nian. Tan nee sei
ezerse liu husi inspesaun neebe sei kompete atu halo inspesaun inkeritu
prosesu disiplinar no kumprimentalmente halibur informasaun konaba
servisu no meritu majistradu ofisial justisa sira nian.
Iha fatin hanesan, Inspetora Ministeriu
Publiku Doutora Angelinha Saldanha agradese ba konselhu superior neebe
tau konfiansa ba nia hodi simu kargu hanesan inspetora ba ministeriu
publiku.“Agradese ba konsellu superior ministeriu publiku nian, neebe
deposita no fo konfiansa mai hau nudar inspetora ministeriu publiku
nian,” tenik Angelinha.
Nia hatutan hanesan inspetora ba
ministeriu publiku neebe primera vez, halonomeasaun ba timor oan ida,
tanba planu prokurador jeral ninian timorizasaun tanba ida nee, ohin
loron nia konsege simu pose nuudar inspetora ba ministeriu publiku em
komisaun de servisu ba tinan tolu nian Inspetora nee informa nia servisu
bainhira konselhu deside mai loke prosesu disiplinar ou inspesaun
ordinaria ka extraordinaria.
Hafoin simu pose, planu primeru inspetora
Angelinha nian mak sei halao vizita ba iha prokurador distrital Baucau,
Suai Oecuse atu bele hatene kondisaun servisu husi majistradu ofisial
justisa sira nian no mos funsionario rejime jeral nian. Depois mak halo
planu halo servisu inspesaun nian, no mos hein desizaun husi konsellu
atu halo inspesaun ba majistradu sira neebe mak iha tempu ona atu hetan
promosaun ba klase tuir mai.
Seremonia tomada da pose nee, partesipa
husi prezidente tribunal rekursu no defensor publiko jeral, familia husi
majistradu emposadu no mos ofisial justisa sira. Terezinha De Deus
Sumber : STL Online
