AMBENO - Konstruksaun
residensia Prezidenti Autoridade (PA) RAEOA no ZEESM Timor Leste iha
Ambeno, Oecusse, kontinua lao. Ekipa konjunta RAEOA no ZEESM Timor Leste
foin dadaun nee identifika ona area neebe uza hodi harii residensia PA-
RAEOA. I komunidade neebe afeitadu ba kontruksaun nee mos konkorda.
Nunee konstruksaun kontinua lao hanesan babain.
Xefi Suku Costa Aleixo Abi ba STL iha
Merkadu Numbei, Suku Costa, Sesta (15/9/2017) hateten, konstruksaun
residensia halo iha Fulolo, Bairo Samoro. Ekipa konjunta mos remata ona
foti medidas konaba moru haleo residensia. Moru nee afeitadu duni ba uma
kain lima iha area Mercadu Numbei.
Residensia nee afeita ba komunidade nia
kintal. Maibe antes kontruksaun residensia hahu, autoridade local avizu
ona i husu komunidade neebe ninia kintal hetan afeitasaun, bele hakerek
naran depois aprezenta ba PA-RAEOA no ZEESM Timor Leste iha Ambeno,
Oecusse. I liu husi planu ordenamentu, sira sei hetan indiminizasaun,
maibe kuandu evidensia laiha, susar uit oan atu hetan indimizasaun.
Husi fatin lahanesan, Direktur Terras
Propriedade RAEOA Selestino Casenube hateten relasiona ho konstruksaun
residensia PA-RAEOA no ZEESM nee, governu presiza foti dadus konaba
komunidade neebe reklama katak, rai iha area Fulolo nee, sira nian.
Momentu prosesu levanta dadus, nia dehan,
balu parese konsege foti i balu la foti. Tamba nee presiza foti tan
dadus para haree problema nee ho justu. I programa governu nian agora
nee, atu halo moru haleu residensia PA-RAEOA. Rezultadu ikus maka
tenki-ser identifika kada parsela, para bele hatene katak, komunidade
nian kintal mak afeitadu, halo ona levantamentu dadus ka lae. Se
komunidade kestiona katak, sira nia rai mas la servisu hamutuk ho Terras
Propriedade, Obras Publiku no Ambiente hodi halo levantamento dadus
sobre rai.
Ho nunee mak bele hatene katak, ida nee
ema nia rai, tenki-ser haree didiak ninia prosesu. Se lae, ema balu
reklama katak, rai nee ninian hotu, maibe tenki iha evidensia klaru.
“Agora dadauk obra kontruksaun residensia
nee lao normal hanesan babain. Komunidade balu hasoru diretamente ho
hau. Sira dehan, rai nee sira mak okupa, depois rai nee mos abandonadu.
Mais Terras Propriedade labele husik deit atu hamamuk fatin refere, ami
sei buka fali fatin ida ba sira hodi hela no halo toos,” nia dehan. Abilio Elo Nini
Sumber : STL Online
