AMBENO - Vendedores sira
iha Merkadu Numbei, komesa hadia sintina publiku iha merkadu refere.
Fasilidade nee governu harii iha tinan 2015, maibe ninia kondisaun
lafunsiona ho diak. Tamba nee vendedores sira iha merkadu nee soe foer
arbiru deit. Tamba nee, autoridade local husu ZEESM nian apoiu hodi
hadia sintina hirak neebe abandona.
Iha merkadu nee iha ona sintina jeral
maibe bee mak laiha. Vendedores sira soe foer arbiru deit. Nee afeita
tebes ba saude komunidade.
Tamba nee mak, autoridade Suku Costa ho
inisiativa hatama proposta ba ZEESM hodi husu apoiu. ZEESM konsege
responde. Fo kareta tenki ida hodi foti bee hodi hadia sintina sira mak
aat, hateten Aleixo Abi bainhira halao enkontru ho vendedores sira iha
Mercadu Numbei, Suku Costa, Postu Administrativu Pante Makasar, Oecusse,
Sesta (15/9/2017).
Hadia sintina iha Merkadu Numbei nee parte husi PDD1 tinan 2015. Rehabilitasaun nee hodi fasilita vendedores sira para labele soe foer arbiru,” nia dehan.
Sobre problema bee mos, Aleixo Abi
hateten, sira nia parte husu ZEESM ajuda kareta tanki bee nian ida para
lori bee ba tau iha sintina sira iha Mercadu Numbei. “I hau mos sei fo
hatene ba estadu konaba preokupasaun bee nee para tau iha lavandaria
sira iha merkadu nee”.
Relasiona ho problema nee, nia mos halo
ona enkontru ho vendedores sira. Iha biban enkontru nee, vendedores sira
husu atu kanaliza deit bee, maibe nia responde, ida nee la forte. Iha
tinan kotuk halo tia ona kanalizasaun, tau profil iha leten maibe bee
lasae. Tenki troka. I governu prepara ona kareta rua hodi ajuda lalin
bee.
Kuandu rehabilita sintina publiku iha
Merkadu Numbei nee hotu no funsiona, se deit mak uza sintina iha merkadu
nee tenki selu. Ba ida nee, vendedores sira forma ona komisaun ida hodi
toma konta. Se mak uza, kada ema tenki selu 10 cent. Se deit mak halo
negosio iha mercadu nee no uza sintina publiku iha merkadu nee tenki
selu. Retribuisaun nee aplika bazea ba Lei Nu. 9/2016.
Tuir lei nee, xefe suku tenki iha
inisiativu kria kampu de trabalho ba komunidade sira. Nunee sira mos
bele hetan ajudus husi governu. Ba asuntu nee, xefe suku kordena ho
parte turizmu nian.
Husi biban lahanesan vendedores Agripina
Belo hateten, kleur ona ema soe foer arbiru deit iha Mercadu Numbei.
Governu harii tiha sintina maibe lafunsiona. Tamba nee mak, bainhira
sira halo enkontru ho xefi suku, sira hotu konkorda buka solusaun.
Solusaun ida maka tenki selu. Se deit mak uza sintina publiku iha
Merkadu Numbei nee tenki selu.
Vendedores Jose Guterres hateten, bee
importante ba buat hot-hotu. Se bee laiha ambiente la furak. I nia
espera, vendedores hot-hotu tenki sai nain lolos ba sintina hirak nee,
atu nunee bele uza kleur.*
Sumber : STL Online
