DILI- Sidadaun Australia
ho inisial TR neebe koko kuda ai horis droga hodi konsumu, hetan ona
prizaun preventiva. Tanba nee tribunal hahu julga, hodi bele hatene
lolos faktus neebe iha.
Antes atu lee sai faktus neebe iha,
tribunal esplika ba arguidu konaba direitu neebe nia iha, atu bele
koalia libertamente konaba faktus neebe iha, no livre mos aprezenta ba
tribunal provas balu neebe iha.
Tuir akuzasaun husi Ministeriu Publiku
katak, iha loron 14 fulan Outobru tinan 2016, iha tuku 08:00 servisu
kriminal nian, simu informasaun katak, iha aldeia Palapaso iha kompania
Tiger Full hetan ai horis balu kuda iha bazu laran, no iha rai henek uma
oin nian.
Iha loron nee Psik indentifika no
deskonfia narkotika mari juana iha neeba, no submete kedan ba iha psik
halo izame no nia rejultadu positivu.
Tipu kategoria husi narkotika Mari Juana
pretense ba arguidu nian, no hetan fini lori ba kuda iha uma, no tau iha
bazu hitu halo plantasaun hodi konsumu ba nia aan. No aihoris sira nee,
peso grupu 50. 49 grama.
Rezultadu husi ai horis nee, uza tahan 54
hodi konsumu ona. No servisu psik nia halo ejame iha laboratoriu
Portugal neebe halo koperasaun ho judisial sira, nia rejultadu hatudu
ona positivu. Psik mos halo atensaun no hetan balitasaun husi tribunal.
Tanba nee, ministeriu publiku akuza
arguidu tuir lei indonezia nian, lei de kombate ao trafiku i eisitus de
droga no 2/2017. Maibe husu nafatin ba defensor sira atu haree didiak
ba lei foun ida nee.
Hatan ba akuzasaun neebe iha, Arguidu
konfesa ba tribunal katak, faktos sira nee loos, tanba nia estres mak
koko atu konsumu ba ai horis droga nian.
Hau kuda ai horis nee, atu hau bele konsmu hodi halakon stress neebe hau iha, no hau hatene ai horis nee konsumu atu halakon estres, tanba hau asesu husi internet google neebe mak iha. Hau la konsumu tahan 54 maibe, hau konsumu deit tahan rua, sira seluk la iha,” hateten arguidu iha sala audensia TDD, Kinta, (21/09/2017).
Arguidu mos konfesa, nia kuda duni ai
horis sira nee iha bazu hitu, maibe ho intensaun atu konsumu hodi
halakon estres. Laos atu fan ba ema seluk. No iha sala audensia arguidu
mos arepende ho nia hahalok ida nee, tanba agora dadaun hetan prizaun
preventive.
Rona tiha deklarasaun husi arguidu
tribunal adia fali julgamentu ba loron 28 fulan Setembru tinan 2017
loraik, hodi rona fali deklarasaun husi testamuna sira.
Audensia julgamentu nee, prezide husi
Juiz kolektivu Ivan Suriati, Duarte Tilman no Maria Modesta. Ministeriu
publiku reprejenta Lidia Soares, no arguidu hetan asistensia legal husi
Advogadu Privadu defeza Jose Guterres. Terezinha De Deus
